LAJMI I FUNDIT: Arrestohet pronari i autoshkollës

Një zhvillim i ri është shënuar në rastin e drogës së konfiskuar së fundmi në Prizren, për të cilën organet e rendit kanë arrestuar pronarin e autoshkollës “Getoari”, nën dyshimin se është i përfshirë në veprimtari të paligjshme të lidhura me substanca narkotike.

Sipas informatave, arrestimi është bërë pas veprimeve që çuan në sekuestrimin e substancave narkotike, të ndërmarra nga njësitet kompetente, të cilat kanë siguruar prova që dyshohet se e ndërlidhin të arrestuarin me rastin e mëhershëm të konfiskimit të drogës.

I dyshuari është shoqëruar fillimisht në stacion policor, ku është intervistuar, ndërsa për rastin është njoftuar prokuroria kompetente, e cila ka urdhëruar ndalimin e tij dhe vazhdimin e hetimeve në drejtim të dokumentimit të plotë të rastit.

Autoritetet nuk kanë dhënë ende detaje shtesë lidhur me rolin konkret të të arrestuarit në këtë rast, ndërsa hetimet janë në fazë të ndjeshme dhe priten zhvillime të tjera.