Ky është punëtori që humbi jetën sot në Prishtinë

Një punëtor ka vdekur dhe një tjetër është lënduar teksa ishin duke punuar sot në rrugën “Faruk Rama” në Prishtinë.

Sinjali mëson se viktima është Bashkim Nitaj, rreth 56-vjeçar, të cilin pllaka e betonit e ka zënë gjatë punimeve.

Kurse, Policia ka bërë të ditur se i lënduari është dërguar për tretman mjekësor.

Zëdhënësi i Policisë për Kryeqytetin, Enis Pllana, e konfirmoi për Sinjalin se rasti është raportuar rreth orës 17:00.

Ai shtoi se autoritetet kanë nisur hetimet për zbardhjen e plotë të rrethanave të rastit tragjik.

“Rreth orës 17:00 kemi pranuar informatën se dy persona janë lënduar derisa ishin duke punuar, në rrugën Faruk Rama në Prishtinë. Si pasojë e lëndimeve, njëri nga personat ka ndërruar jetë.

Vdekja e tij është konstatuar nga ekipi i mjekëve emergjent në vendin e ngjarjes, ndërkohë që personi tjetër i lënduar është dërguar për tretman mjekësor. Aktualisht policia në koordinim me inspektorët e punës dhe prokurorinë, kanë nisur hetimin e rrethanave që karakterizojnë rastin”, tha ai.