Lëndohen dy minatorë në vendin e punës

Dy minatorë të Trepçës, Elson Rrustemi dhe Përparim Beqiri, kanë pësuar lëndime në sy mbrëmjen e së shtunës, si pasojë e pluhurit të shpërndarë gjatë fryerjes së një gome.

Ndërmarrja Trepça njoftoi se punëtorëve iu është ofruar ndihma e parë në vend, dhe më pas janë dërguar në Spitalin Rajonal të Mitrovicës për trajtim mjekësor. Pas trajtimit, ata janë liruar për në shtëpi.

“Me datë 22.11.2025 në ora 20:20 minuta punëtorët Erson Rrustemi dhe Përparim Beqiri janë lënduar në vendin e tyre të punës në horizontin X-të. Incidenti ka ndodhur gjatë fryerjes së gomës së kamionit e cila ka shpërthyer dhe PLUHURI I SAJ u ka shkaktuar lëndime në sy. Pas incidentit të dy punëtorëve iu është dhënë ndihma e parë, pastaj janë dërguar në spitalin regjional në Mitrovicë dhe pas trajtimit mjekësor janë liruar në shtëpi”, thuhet në njoftim,.

Trepça Sh.A. me të marrë informacionin për lëndimin e punëtorëve zyrtarisht e ka njoftuar inspektoratin e Komisionit të Pavarur për Miniera dhe Minerale (KPMM).

Trepça ka informuar Inspektoratin e Komisionit të Pavarur për Miniera dhe Minerale (KPMM) dhe ka formuar një komision të brendshëm për të vlerësuar situatën dhe përgatitur raportin zyrtar.

Në njoftim, Trepça theksoi angazhimin e saj për një ambient pune të sigurt, duke zbatuar standardet ligjore dhe duke investuar në trajnimin e punëtorëve për të parandalua rreziqet dhe lëndimet në vendin e punës.