Agani e Rrahmani ndajnë rrugët, njëri drejt LDK-së e tjetri drejt PDK-së
Ferid Agani dhe Eman Rrahmani të cilët në zgjedhjet e shkurtit kishin bashkuar forcat në “Koalicionin për Familje”, po duket se po ndjekin rrugë të ndryshme politike para zgjedhjeve të dhjetorit.
Sipas burimeve të “Front Online”, Eman Rrahmani pritet që nesër të nënshkruajë një koalicion me PDK-në, duke hapur një kapitull të ri në angazhimin e tij politik, ndërsa Agani pritët t’i bashkohet Lidhjes Demokratike të Kosovës.
Kryetari i Partisë së Drejtësisë, Ferid Agani ka folur për “Front Online” për bashkëpunimin e tij me Eman Rrahmanin, me të cilin kishte garuar së bashku në zgjedhjet e shkurtit.
“Koalicioni për Familjen ka qenë një bashkëpunim i përbashkët i katër partnerëve politikë dhe rezultati prej rreth 20 mijë votash i atij koalicioni është kapital kolektiv, jo i asnjë individi”, theksoi Agani.
Sipas Aganit, çdo angazhim politik i deriatëhershëm ka qenë pjesë e një përpjekjeje kolektive, ndërsa orientimet e ardhshme politike mbeten zgjedhje të secilit individ.
“Çdo subjekt apo individ është i lirë të zgjedhë orientimin e vet politik, por rezultati i Koalicionit për Familje nuk mund të paraqitet si votë personale dhe as të bartet në ndonjë subjekt tjetër. Ne mbetemi të përkushtuar ndaj etikës politike, korrektësisë dhe respektimit të kontributit të të gjithë partnerëve”, tha Agani për “Front Online”.
