Dy kompani ajrore i anulojnë fluturimet shkaku i hirit të vullkanit

Kompanitë ajrore “Air India” dhe “Akasa Air” thanë të martën se do të anulonin disa fluturime, pasi hiri nga shpërthimi i një vullkani në Etiopi po i pengonte operacionet.

“Air India” tha se kishte anuluar 11 fluturime të hënën dhe të martën për të bërë kontrolle kujdesi në aeroplanët që kishin fluturuar mbi disa lokacione pas shpërthimit të vullkanit, duke ndjekur një udhëzim nga rregullatori ajror indian, raporton agjencia e lajmeve “Reuters”.

Kompania tjetër, “Akasa Air”, tha se kishte anuluar fluturime të planifikuara drejt destinacioneve të ndryshme në Lindjen e Mesme si Jeddah, Kuvajt dhe Abu Dabi që ishin paraparë gjatë atyre dy ditëve.

Hiri është duke lëvizur drejt Kinës dhe pritej të pastrohej nga qielli i Indisë deri në orën 14:00 të martën, thuhet në një deklaratë të Departamentit të Meteorologjisë në Indi.

Vullkani “Hayli Gubbi” e dërgoi hirin deri në 14 kilometra lartësi në qiell, pasi shpërtheu të dielën për herë të parë në historinë e regjistruar, sipas raportimeve të mediave.

Të martën, hiri mbuloi disa pjesë të Pakistanit dhe Indisë veriore, sipas uebfaqes “Flightradar24”, pasi kishte kaluar fillimisht mbi Jemen e Oman.