4 kosovarë kapen duke punuar ilegalisht në Gjermani, njëri përfundon në burg

Një kontroll rutinë policor në Bad Wiessee të Bavarisë ka zbuluar katër punëtorë nga Kosova që po punonin ilegalisht në rrethin e Miesbach.

Të katër personat ndodheshin në një furgon me targa sllovene, i cili u ndalua nga policia gjatë orëve të mëngjesit.

Policia gjermane njoftoi se personat ishin të moshës 22 deri në 44 vjeç dhe nuk posedonin dokumentet e nevojshme për punë dhe qëndrim në Gjermani.

Pas verifikimeve, autoritetet konstatuan se njëri prej tyre – 44 vjeçar – kishte edhe një urdhër aktiv arresti për shkelje të ligjit të qëndrimit.

Ky person nuk arriti të paguante shumën e caktuar nga gjykata për të shmangur burgun dhe u dërgua direkt në Qendrën e Paraburgimit në Bernau am Chiemsee.

Ndërkohë, tre personat e tjerë do të përballen me procedura penale për qëndrim të paligjshëm.

Rasti ka hapur hetime edhe ndaj kompanisë që i ka punësuar, me dyshimin se ka shfrytëzuar punëtorë pa dokumentacion të rregullt. Autoritetet paralajmërojnë kontrolle të shtuara në zonë për të luftuar punësimin ilegal.