Shpejtim Bulliqi fillon zyrtarisht mandatin e ri qeverisës

Postimi i Shpejtim Bulliqit:

Sot, në një seancë solemne të Kuvendit Komunal dhashë betimin tim si Kryetar i rizgjedhur i Komunës së Podujevës, duke marrë zyrtarisht përgjegjësinë për mandatin e ri qeverisës. Në të njëjtën seancë, betimin e dhanë edhe anëtarët e rinj të Kuvendit Komunal, të cilët nga sot marrin detyrën për të përfaqësuar vullnetin e qytetarëve në legjislaturën e re.

Shpreh gatishmërinë e plotë për bashkëpunim të ngushtë me të gjithë anëtarët e Kuvendit, pavarësisht përkatësisë së tyre politike për interesin e qytetarëve dhe të Komunës.

Zotohem që zyra ime do të udhëhiqet nga parimi i gjithëpërfshirjes dhe trajtimit të barabartë sipas ligjit. Shërbimi për qytetarët dhe ndaj qytetarëve do të jetë detyrë e jona e përditshme.

Mandati i ri do të vazhdojë me intensitet të shtuar të punës në projekte zhvillimore dhe në përmirësimin e mirëqenies qytetare, me qëllim që çdo qytetar të ndjejë dorën e shtetit.

Kjo detyrë është nderi i jetës – për t’ju shërbyer e për të qenë pranë juve gjithmonë!