IKSHPK: Më 2025 në Kosovë janë regjistruar 6 vdekje nga HIV/AIDS
31 raste të reja me HIV/AIDS janë regjistruar gjatë vitit 2025 në Kosovë ndërsa gjashtë persona kanë vdekur nga kjo sëmundje. Këto të dhëna u bënë të ditura në Ditën Botërore kundër AIDS, e cila shënohet më 1 dhjetor.
Në tryezën e organizuar nga Ministria e Shëndetësisë, në bashkëpunim me Institutin Kombëtar të Shëndetësisë Publike të Kosovës (IKSHPK) me rastin e Ditës Botërore të AIDS-it u tha personat e prekur janë të moshave 25-35 vjeç.
“Shohim një rritje të rasteve me HIV/AIDS nga viti 2022. Në vitin 2022 kemi pasur 21 raste, në vitin 2023, 20 raste, ndërsa në vitin 2024 i kemi pasur 34 raste dhe vitin 2025 që kemi 31 raste dhe gjashtë vdekje”- ka thënë Luljeta Gashi nga Departamenti i Epidemiologjisë në IKSHPK.
Instituti Kombëtar i Shëndetësisë Publike ka vlerësuar se situata epidemiologjike në Kosovë vlerësohet të jetë në nivel të ulët.
“Në Kosovë, situata epidemiologjike vlerësohet të jetë në nivel të ulët. Prevalenca e HIV-it në mesin e popullatës së përgjithshme është më pak se 1%, ndërsa në subpopullatat specifike,si meshkujt që bëjnë seks me meshkuj (MSM), personat që injektojnë drogë (PID) dhe punëtoret e seksit femra (PSF), ajo shkon deri në më pak se 5%”- thuhet në komunikatën e këtij institucioni.
HIV (Human Immunodeficiency Virus) është virusi që sulmon gradualisht sistemin imunitar të njeriut, duke dëmtuar aftësinë e organizmit për t’u mbrojtur nga sëmundjet. Me kalimin e kohës, nëse nuk trajtohet, ky proces çon në dobësimin e rëndë të imunitetit dhe mund të rezultojë në shkatërrimin e sistemit mbrojtës të organizmit, duke krijuar rrezik për komplikime serioze shëndetësore.
Ky virus transmetohet nga një person tek tjetri përmes marrëdhënieve seksuale të pambrojtura, kalimi i virusit direkt në gjak dhe kalimi i virusit nga nëna tek fëmija.
Sipas të dhënave të publikuara nga IKShPK rreth 40.8 milionë njerëz në mbarë botën jetojnë me HIV, ndërsa vetëm gjatë këtij viti 1.3 milionë individë janë infektuar.
