Rrahje në Podujevë për arsye banale

Një incident i dhunshëm ka ndodhur pasditen e 11 dhjetorit 2025 në rrugën “Skënderbeu” në Podujevë, ku një mosmarrëveshje për një vend parkingu ka përfunduar me përleshje fizike dhe kanosje.

Sipas informatave, rreth orës 15:00, pas një konflikti verbal, ka shpërthyer një përleshje fizike duar-thatë mes dy personave, njëri rreth 24-vjeçar dhe tjetri rreth 28-vjeçar.

Burimet bëjnë të ditur se konflikti ka nisur për shkak të një parkingu të veturës.

Gjatë incidentit, në vendngjarje ka qenë i pranishëm edhe një person i tretë, rreth 59-vjeçar, i cili dyshohet se ka kanosur me fjalë njërin nga të përfshirët në rrahje.

Lidhur me rastin është njoftuar Prokurori Kujdestar nga Departamenti i Përgjithshëm, i cili ka urdhëruar që ndaj dy personave të përfshirë në rrahje të hapet rasti “Sulmi”, ndërsa të njëjtit të lirohen në procedurë të rregullt.

Ndërkohë, ndaj personit të tretë është iniciuar rasti “Kanosje”, me ç’rast, me urdhër të prokurorit, i dyshuari është dërguar në mbajtje për 48 orë.

Hetimet lidhur me këtë incident janë në zhvillim.