LAJMI I FUNDIT: Ky është 19 vjeçari që u plagos

Rasti që fillimisht ishte raportuar si vetëplagosje në Pejë ka marrë një kahje tjetër hetimore, pas analizimit të rrethanave nga autoritetet kompetente.

Burime të besueshme nga Spitali Rajonal në Pejë dhe struktura të afërta me hetimin bëjnë të ditur për Gazetën Sinjali se ngjarja ka ndodhur rreth orës 19:15, ndërsa i plagosuri, Dion Buquku, 19 vjeç, në momentin e incidentit ka qenë i shoqëruar nga një person tjetër dhe ndodhej në veturë.

Fillimisht rasti ishte raportuar si vetëplagosje, por hetimet e deritanishme kanë zbardhur se i riu ka qenë viktimë e një të shtënë aksidentale me armë zjarri, e shkaktuar nga shoku i tij, i cili ndodhej me të në veturë. Nga të shtënat, i riu ka pësuar plagosje në këmbë.

Sipas burimeve, i dyshuari është tashmë i shoqëruar në stacion policor, ku po intervistohet nga njësitë përkatëse, ndërsa rasti po trajtohet në përputhje me procedurat ligjore dhe hetimore në fuqi.

Nga spitali është mësuar se i plagosuri ka pranuar tretmanin e nevojshëm mjekësor dhe se gjendja e tij shëndetësore është stabile, duke qenë jashtë rrezikut për jetë.

Hetimet janë në vazhdim, ndërsa pritet që Prokuroria të përcaktojë cilësimin përfundimtar të veprës penale pas kompletimit të provave.