Burri rrah partneren në Hotel Emerald, arrestohet nga Policia

Një rast i dhunës në familje është regjistruar në orët e para të mëngjesit në Hotel Emerald, në fshatin Preoc të Graçanicës, ku një shtetase e huaj ka përfunduar në trajtim mjekësor pas sulmit fizik nga partneri i saj, mëson ekskluzivisht Gazeta Sinjali.

Burime nga hoteli Emerald thonë se ngjarja ka ndodhur më 15 dhjetor 2025, rreth orës 02:00 dhe  Policia është njoftuar nga recepsioni i hotelit për zhurmë dhe shqetësime të mëdha që vinin nga njëra prej dhomave, ku ishte i akomoduar një çift nga Mbretëria e Bashkuar.

Njësitë policore, pas daljes në vendin e ngjarjes, kanë hasur viktimën N. J R. shtetase e Mbretërisë së Bashkuar, e cila kishte shenja të dukshme dhune fizike. Ajo është dërguar menjëherë në Qendrën Emergjente në Prishtinë për trajtim mjekësor.

Ndërkohë, partneri i saj, i dyshuari A.Q, shqiptar, po ashtu shtetas britanik, është shoqëruar në Stacionin Policor në Graçanicë, raporton Sinjali.

Sipas informacioneve, viktima nuk ka pësuar lëndime të rënda trupore dhe pas trajtimit është liruar. Por, gjatë deklarimit të saj, ajo ka sqaruar se konflikti kishte nisur për shkak të një borxhi që, sipas të dyshuarit, ajo nuk ia kishte kthyer vëllait të tij. Pas një debati verbal dhe nën ndikimin e alkoolit, i dyshuari dyshohet se ka ushtruar dhunë fizike ndaj viktimës, duke e goditur me grushte në kokë dhe pjesë të tjera të trupit.

Testimet kanë treguar se i dyshuari dhe viktima ishin nën ndikim të alkoolit, thonë burimet.

Lidhur me rastin është njoftuar prokurori kujdestar, i cili ka urdhëruar vazhdimin e hetimeve. Me vendim të tij, rasti është iniciuar si procedurë penale për veprën “Dhunë në familje”.

I dyshuari është ndaluar për 48 orë dhe është dërguar në qendrën e ndalimit. Hetimet janë duke vazhduar.