Ky është personi që u gjet i vdekur në veri

Një rast i rëndë është regjistruar mbrëmjen e 20 dhjetorit 2025 në Leposaviq, ku një person është gjetur pa shenja jete brenda banesës së tij.

Ngjarja ka ndodhur rreth orës 18:40, në rrugën Dositej Obradovic, ku qytetarë kanë njoftuar Policinë se një person që jetonte i vetëm nuk po u përgjigjej thirrjeve telefonike, duke ngritur dyshime se mund t’i kishte ndodhur diçka.

Sipas informatave, njësia policore, së bashku me hetuesin dhe krim-teknikun, kanë dalë në vendin e ngjarjes, ku kanë takuar disa dëshmitarë, por dera e banesës ka qenë e mbyllur. Për këtë arsye, është kërkuar asistenca e zjarrfikësve, të cilët kanë hapur derën e banesës.

Brenda, në dyshemenë e banesës, është gjetur i shtrirë Radisa Barac, i lindur më 1960, me gjakderdhje të dukshme nga hunda dhe goja. Në vendin e ngjarjes ka dalë edhe ekipi i ndihmës së shpejtë, ku mjeku kujdestar ka konstatuar vdekjen e tij.

Po ashtu, në vendin e ngjarjes ka dalë edhe ekipi i Mjekësisë Ligjore, ndërsa Prokurori kujdestar është njoftuar për rastin. Me urdhër të tij, trupi i pajetë është dërguar në Institutin e Mjekësisë Ligjore (IML) për kryerjen e obduksionit, me qëllim të sqarimit të plotë të shkaqeve të vdekjes.

Hetimet për këtë rast janë në vazhdim.