LAJMI I FUNDIT: Burrë e grua shqiptarë që po vinin nga Gjermania aksidentohen për vdekje

Dy shqiptarë kanë humbur jetën tragjikisht në një aksident të rëndë trafiku që ka ndodhur në orët e hershme të mëngjesit në afërsi të Umçarit, në autostradën Beograd–Nish, në Serbi.

Sipas mediave rajonale, aksidenti ka ndodhur kur një veturë me targa gjermane, në të cilën udhëtonin viktimat, ka dalë nga rruga dhe është përplasur me barrierat mbrojtëse, duke shkaktuar pasoja fatale.

Në vendin e ngjarjes kanë ndërruar jetë një burrë dhe një grua me prejardhje shqiptare, ndërsa një person i tretë ka mbetur rëndë i lënduar dhe është dërguar me urgjencë në spital.

Sipas informacioneve të para, dyshohet se shoferi ka rënë në gjumë gjatë vozitjes, çka mund të ketë çuar në humbjen e kontrollit mbi automjetin. Autoritetet serbe ende nuk kanë dhënë një konfirmim zyrtar për shkakun përfundimtar të aksidentit.

Policia ka kryer ekspertizën në vendin e ngjarjes, ndërsa qarkullimi në këtë segment të autostradës ka qenë i vështirësuar për disa orë.