30 ditë paraburgim për zyrtarin policor të dyshuar për marrje ryshfeti

Një zyrtar i Policisë së Kosovës ka përfunduar në paraburgim për 30 ditë, nën dyshimet për përfshirje në veprimtari korruptive gjatë ushtrimit të detyrës zyrtare.

Burime të sigurta bëjnë me dije se zyrtari, me detyrë në një pikë kufitare, dyshohet se ka kërkuar dhe pranuar ryshfet për të lejuar kalimin e paligjshëm të një shtetasi të huaj në territorin e Kosovës, pavarësisht se hyrja e tij ishte refuzuar më herët.

Ngjarja raportohet të ketë ndodhur më 22 dhjetor 2025, rreth orës 08:00, në pikën kufitare, ku polici dyshohet se ka kërkuar shumën prej 50 eurosh për të mundësuar kalimin e kufirit. Shtetasi i huaj dyshohet se ka ofruar ryshfet dhe ka hyrë në mënyrë të paligjshme në vend.

Seanca për caktimin e masës së paraburgimit është mbajtur në ambientet e një spitali, pasi zyrtari ndodhet nën trajtim mjekësor për probleme kardiake. Gjendja shëndetësore është marrë parasysh vetëm për vendin e mbajtjes së seancës, por jo për lehtësim të masës së sigurisë.

Hetimet kanë nxjerrë në pah prova materiale, përfshirë komunikime telefonike, lëvizje të dyshimta dhe dokumente që dyshohet se janë përdorur për kalime të paligjshme kufitare.

Për shkak të rrezikut të ndikimit në dëshmitarë, fshehjes së provave dhe përsëritjes së veprës penale, gjykata ka vendosur paraburgim për të dyshuarin.

Rasti po trajtohet nga Departamenti për Krime të Rënda, ndërsa hetimet vazhdojnë dhe nuk përjashtohet mundësia e përfshirjes së të tjerëve në këtë skemë.