Detaje të reja tronditëse nga vrasja e gruas nga Kosova në Zvicër

Detaje të reja kanë dalë në dritë nga ngjarja tragjike që tronditi Zvicrën të mërkurën, ku një grua 71-vjeçare nga Kosova u gjet e vdekur në Buchs.

Gazeta zvicerane “Blick” ka publikuar rrëfimet e banorëve të lagjes ku dyshohet se ka ndodhur krimi i rëndë.

Njëri nga banorët ka deklaruar se gruaja e ndjerë vuante nga probleme shëndetësore.

“Pashë automjete të panumërta policie këtë mëngjes”, tha një banor i kompleksit, ndërsa një tjetër u shpreh e tronditur nga rasti.

“Jam e tronditur nga ajo që ka ndodhur këtu, në lagjen tonë të qetë. Fatkeqësisht, policia nuk mundi të na qetësonte apo të na tregonte se çfarë kishte ndodhur”, tha banorja për “Blick”.

Ajo theksoi se familja që jetonte në shtëpinë ku ndodhi ngjarja e trishtë nuk ishte shumë e njohur në këtë lagje.

Lidhur me këtë rast të rëndë janë arrestuar tre persona të moshës 27, 48 dhe 51 vjeç, ndërsa autoritetet tashmë kanë nisur hetimet./Klankosova.tv