LAJMI I FUNDIT: A do të bëhet Agim Veliu kryetar i LDK-së?

Ish-kryetari i Podujevës, Agim Veliu ka reaguar me anë të një postimi në facebook pas rënies së madhe që LDK e pësoi në zgjedhjet e 28 dhjetorit.

Në një postim të gjatë, Veliu tha se duhet të ketë llogaridhënie publike për humbjet politike.

Ndërsa, sa i përket kandiditimit për kryetar të LDK-së, Veliu nuk ka bërë të ditur nëse do të jetë kandidat për të parin e Lidhjes Demokratike të Kosovës.

Më poshtë postimi i tij:

Humbjet radhazi nuk janë rastësi. Ato janë verdikt i qartë politik.
Mosreflektimi pas tyre nuk është më gabim – është refuzim i përgjegjësisë.
Një parti që kërkon besimin e qytetarëve nuk mund të sillet sikur humbjet nuk kanë autor. Mbyllja ndaj kritikës, mungesa e analizës dhe kapja e vendimmarrjes e kanë dëmtuar rëndë partinë dhe e kanë larguar shumë nga misioni i saj.

Kërkoj publikisht dhe pa ekuivoke:

– llogaridhënie politike për humbjet,
– transparencë të plotë mbi vendimmarrjen, e cila mungon kohë të gjatë në LDK,
– dhe hapjen e menjëhershme të një procesi demokratik të brendshëm, me garë reale në të gjitha nivelet!
Askush nuk është mbi partinë.
Askush nuk ka mandat të përhershëm nga humbja.
Nëse nuk ka reflektim dhe ndryshim, ky drejtim nuk mund të mbrohet më dhe nuk i shërben të ardhmes së Lidhjes Demokratike të Kosovës.