E dhimbshme: Ndërron jetë këmbësori që u godit nga vetura në Prishtinë

Një aksident trafiku i ndodhur ditë më parë në Prishtinë ka përfunduar me pasoja fatale. Gazeta Sinjali mëson se këmbësori, i cili ishte goditur nga një veturë në rrugën “Sokol Sopi”, ka ndërruar jetë derisa ishte duke u trajtuar në Qendrën Klinike Universitare të Kosovës (QKUK).

Ngjarja kishte ndodhur më 30.12.2025, rreth orës 16:45, kur një veturë e tipit Hyundai kishte goditur një këmbësor rreth 70-vjeçar. Sipas informatave fillestare, viktima ishte duke kaluar rrugën jashtë vendkalimit të shënuar për këmbësorë.

Si pasojë e aksidentit, këmbësori kishte pësuar lëndime trupore në këmbë dhe ishte dërguar për tretman mjekësor në QKUK, ku fillimisht gjendja e tij shëndetësore ishte raportuar si stabile. Rasti në atë fazë ishte trajtuar nga Njësia e Trafikut Rrugor.

Megjithatë, sot, më 09.01.2026, rreth orës 09:00, familjarët kanë njoftuar autoritetet se i lënduari ka ndërruar jetë gjatë trajtimit mjekësor në QKUK.

Me këtë zhvillim, Prokurori i Shtetit është njoftuar për rastin dhe ka udhëzuar që trupi i të ndjerit të dërgohet për obduksion, me qëllim të sqarimit të plotë të rrethanave të vdekjes.

Rasti tashmë është rikualifikuar dhe do të trajtohet nga Njësia e Hetimeve të Trafikut Rrugor, si aksident trafiku me fatalitet.

Hetimet janë në vazhdim.