Përleshje me thika në këtë fshat të Podujevës

Një incident i rëndë mes të miturve është regjistruar dje në fshatin Lupq të Podujevës, ku një përplasje ka eskaluar në përdorim të thikës dhe shufrës metalike, duke lënë të lënduar të paktën një nga të përfshirët.

Burime të besueshme të Sinjalit bëjnë të ditur se në rast janë përfshirë tre të mitur. Sipas informatave fillestare, dy prej tyre kishin qenë duke pritur autobusin, ndërsa në momentin që i mituri i tretë ka zbritur nga autobusi, situata ka degjeneruar menjëherë në konflikt fizik.

Dyshohet se njëri nga të miturit ka sulmuar fillimisht njërin prej tyre me mjet të mprehtë (thikë), duke i shkaktuar lëndime në këmbë, në zonën e kofshës. Në vazhdim të incidentit, i mituri i lënduar dyshohet se e ka goditur sulmuesin në kokë me shufër metalike, ndërsa i mituri tjetër dyshohet se e ka goditur atë me grushte në këmbë.

Të miturit janë intervistuar në prani të Qendrës për Punë Sociale dhe avokatëve mbrojtës, ndërsa të përfshirët kanë pranuar trajtim mjekësor.

Në konsultim me Prokurorin kujdestar për të mitur, rasti është iniciuar si vijon: ndaj njërit të mitur për “Lëndim të rëndë trupor”, ndaj një tjetri për “Lëndim të rëndë trupor” dhe “Armëmbajtje pa leje”, ndërsa ndaj të miturit të tretë për “Lëndim të lehtë trupor” dhe “Armëmbajtje pa leje”.

Me urdhër të prokurorit, njëri nga të miturit është ndaluar për 24 orë, ndërsa dy të miturit e tjerë janë liruar në procedurë të rregullt. Hetimet për zbardhjen e plotë të rrethanave dhe përgjegjësive po vazhdojnë.