Rrahje në parkingun e ETC-së

Një incident është shënuar pasditen e së shtunës në Mitrovicë të Jugut, ku dy persona janë përfshirë në një përleshje fizike në afërsi të marketit “ETC”.

Burime të besueshme bëjnë me dije se rasti ka ndodhur më 17 janar 2026, rreth orës 15:40, në rrugën “Bislim Bajgora”, ku është raportuar një rrahje në progres.

Në këtë rast dyshohet se janë përfshirë dy persona, një rreth 22-vjeçar dhe tjetri rreth 60-vjeçar.

Sipas informatave, njëri nga ta ishte mirëmbajtës i parkingut të ETC-së, ndërsa tjetri taksist, i cili po priste me veturën e tij në parking.

Ngjarja dyshohet se ka nisur pasi punëtori i parkingut i ka kërkuar taksistit të largohet nga vendi, me arsyetimin se hapësira ishte e rezervuar. Në ato momente, taksisti dyshohet se ka reaguar me fyerje në gjuhën serbe, duke vazhduar më pas drejt tij dhe duke e goditur me grushte disa herë.

Përleshja është ndalur nga një kalimtar i rastit, ndërsa taksisti është larguar menjëherë në drejtim të Mitrovicës së Veriut.

Si pasojë e goditjeve, lëndime në fytyrë dhe buzë ka pësuar punëtori i parkingut të marketit “ETC”.

Në lidhje me rastin është njoftuar njësia e hetimeve, e cila ka dalë në vendin e ngjarjes dhe, në konsultim me prokurorin kujdestar, është udhëzuar të sigurojë kamerat e sigurisë si dhe të intervistojë palët dhe dëshmitarët.

Pas intervistimit të të përfshirëve dhe analizimit të pamjeve nga kamerat e sigurisë, rasti është iniciuar si “Sulm”.

Hetimet janë në zhvillim e sipër dhe pritet që të dy të dyshuarit të trajtohen në cilësi të personave të dyshimtë.