Ter Stegen largohet nga Barcelona, transferohet te ky ekip i La Ligas

Girona ka arritur marrëveshje verbale për transferimin e portierit Marc-André ter Stegen në formë huazimi. Pas dritës jeshile që portieri gjerman i dha marrëveshjes javën e kaluar, edhe klubet kanë rënë dakord mes vete, duke hapur rrugën për hapat formalë që pritet të finalizohen gjatë kësaj jave.

Sipas burimeve të afërta me negociatat, marrëveshja mes Gironës dhe Barcelonës tashmë është në vend, ndërsa dokumentacioni zyrtar do të përfundohet në ditët në vijim. Ter Stegen pritet të bashkohet me skuadrën spanjolle si huazim deri në muajin qershor.

Ky vendim vjen pas dëshirës së qartë të portierit gjerman për të pasur minuta të rregullta në fushë, sidomos në prag të Kampionatit Botëror 2026. Aktivizimi konstant konsiderohet vendimtar për ruajtjen e formës dhe statusit të tij në kombëtaren e Gjermanisë.

Girona, nga ana tjetër, fiton një portier me përvojë të jashtëzakonshme në nivelet më të larta të futbollit evropian. Prania e Ter Stegen pritet të rrisë ndjeshëm sigurinë në prapavijë dhe ambiciet e klubit për sezonin në vazhdim.