Ministria e Bujqësisë del me një njoftim për fermerët

Ministria ka rekomanduar që të shfrytëzohet maksimalisht kjo kohë, sepse krasitja e vonuar jep efekte dukshëm më të vogla në zhvillimin dhe prodhimtarinë e pemëve.

Më poshtë postimi:

Të nderuar fermerë,

Periudha aktuale është më e përshtatshmja për krasitjen e të gjitha llojeve të pemëve frutore. Ju rekomandojmë që ta shfrytëzoni maksimalisht këtë kohë, sepse krasitja e vonuar jep efekte dukshëm më të vogla në zhvillimin dhe prodhimtarinë e pemëve.

Sipas periudhës kur kryhet, krasitja ndahet në dy lloje:

1. Krasitja dimërore – kryhet gjatë periudhës së qetësisë së pemës;
2. Krasitja e gjelbër – kryhet gjatë periudhës së vegjetacionit.

Në këtë njoftim po fokusohemi në krasitjen dimërore, duke sqaruar çfarë është, pse dhe kur aplikohet.
Çfarë është krasitja?

Krasitja është një masë e rregullt agroteknike që realizohet çdo vit, gjatë periudhës së qetësisë dimërore dhe, sipas nevojës, edhe gjatë vegjetacionit.
Qëllimi kryesor i krasitjes është:

 Formimi i një kurore të rregullt,
 Sigurimi i rritjes dhe zhvillimit të degëzave me sytha prodhues,
 Ruajtja e ekuilibrit ndërmjet rritjes vegjetative dhe prodhimtarisë.
Krasitja e rregullt ndikon drejtpërdrejt në:
 Rinovimin e vazhdueshëm të pemës,
 Rritjen e jetëgjatësisë së saj,
 Prodhim më të lartë dhe cilësi më të mirë të frutave.
Në praktikë, krasitja konsiderohet arti i drejtimit të rritjes natyrore të pemës, duke e përshtatur atë për prodhim më të qëndrueshëm dhe më cilësor.
Pse dhe kur aplikohet krasitja?

Përmes krasitjes:

 Formohet kurora e pemës,
 Eliminohet prodhimi periodik (një vit me fruta, një vit pa fruta),
 Përmirësohet depërtimi i rrezeve të diellit dhe ajrosja e kurorës,
 Zvogëlohet rreziku nga sëmundjet dhe dëmtuesit,
 Rregullohet qarkullimi i materieve ushqyese ndërmjet rrënjës dhe pjesës mbitokësore.
Të gjithë këta faktorë ndikojnë drejtpërdrejt në rritjen e rendimentit dhe përmirësimin e cilësisë së prodhimit.
Koha e përshtatshme për krasitje dimërore
Krasitja dimërore aplikohet gjatë periudhës së qetësisë natyrore të pemës. Rekomandohet që të kryhet:

 Pas kalimit të temperaturave shumë të ulëta,
 Varësisht nga kushtet klimatike të zonës.
Në kushtet tona klimatike, muajt më të përshtatshëm për krasitje janë Shkurt – Mars.
Këshilla dhe mbështetje

Për çdo këshillë apo sqarim lidhur me krasitjen dimërore, si dhe për praktika të tjera në bujqësi dhe zhvillim rural, ju ftojmë të drejtoheni te këshilltarët e QIKK-ve (Qendrat Informative Këshilluese Komunale).
Në QIKK mund të pajiseni gjithashtu edhe me materiale të shtypura informative sipas nevojave tuaja.
Departamenti i Shërbimeve Këshillimore dhe Teknike – MBPZHR
Rr. “Ukshin Hoti”, Ndërtesa e ish “Ramiz Sadiku”, nr. 120, Kati III
Prishtinë – Kosovë

Tel: +383 (0)38 200 38 426