Faton Peci paralajmëroi kallëzim penal ndaj tij, Paris Guri: Mezi e pres përballjen në gjykatë

Deputeti Paris Guri ka reaguar pas intervistimit nga Prokuroria e Kosovës të ish-ministrit të Bujqësisë, Faton Peci, lidhur me kallëzimin penal të paraqitur ndaj tij për keqpërdorim të detyrës zyrtare dhe keqpërdorim të buxhetit të shtetit.

Përmes një postimi publik, Guri ka përshëndetur veprimin e Prokurorisë, duke shprehur shpresën se procesi nuk do të mbetet vetëm në fazën e intervistimit, por do të vazhdojë deri në, siç tha ai, “dënimin e merituar” për të gjithë ata që kanë keqpërdorur paratë publike. Ai ka theksuar se do të vazhdojë denoncimin e rasteve që, sipas tij, lidhen me shpërndarjen e buxhetit shtetëror te familjarë të eksponentëve të Lëvizjes Vetëvendosje.

Guri ka reaguar edhe ndaj kallëzimit penal të bërë nga ministri Peci ndaj tij, duke e cilësuar atë si të pabazë dhe duke deklaruar se e mirëpret përballjen në gjykatë. Sipas tij, i vetmi “orkestrim” ka qenë ai për shpërndarjen e mjeteve buxhetore në mënyrë të kundërligjshme.

Në postimin e tij, deputeti ka përmendur edhe çështjen e rinumërimit të votave, duke listuar emra të zyrtarëve për të cilët pretendon se u janë vjedhur ose hequr vota, përfshirë edhe veten e tij. Ai ka deklaruar se mezi pret ftesën e Prokurorisë dhe ka paralajmëruar se nuk do të ndalet së denoncuari, sipas tij, “të gjitha hajnitë” e bëra ndaj buxhetit të shtetit.