Ekskluzive: Këta dy të burgosur u arratisën nga burgu

Dy persona të privuar nga liria janë arratisur mbrëmjen e së premtes nga Qendra Edukuese Korrektuese në Lipjan, duke vënë në alarm autoritetet policore.

Ngjarja ka ndodhur më 07.02.2026, rreth orës 21:00, në rrugën “Ismet Asllani”, ku mbikëqyrësi i Qendrës ka njoftuar Policinë se dy të burgosur kanë ikur nga objekti korrektues.

Sipas informatave zyrtare, bëhet fjalë për Isuf Mehdi Bajrami (19 vjeç) nga fshati Radev i Graçanicës dhe një i mitur me inicialet V.B. (17 vjeç), shtetas malazez, të cilët ndodheshin në vuajtje të dënimit.

Menjëherë pas pranimit të informacionit, të gjitha njësitë relevante policore janë angazhuar në terren për lokalizimin e tyre, por deri në këto momente nuk është arritur arrestimi i personave të arratisur.

Burime të afërta me hetimin bëjnë të ditur se për rastin është konsultuar Prokurori kompetent, ndërsa ngjarja është inicuar dhe hetimet janë në zhvillim.

Policia po vazhdon kërkimet intensive, ndërsa pritet që në orët në vijim të ketë zhvillime të reja lidhur me këtë arratisje.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.