Kurti pret në takim Kryeministrin e Shqipërisë

Kryeministri i Kosovës, Albin Kurti, ka pritur në takim Kryeministrin e Shqipërisë, Edi Rama, me të cilin ka diskutuar për marrëveshjet bilaterale ekzistuese dhe mundësitë për zgjerimin e bashkëpunimit në fusha të ndryshme.

Sipas Kurtit, gjatë takimit është biseduar për mundësitë e reja të bashkëpunimit, shfrytëzimin sa më të mirë të tyre, si dhe për sfidat e përbashkëta me të cilat përballen të dy vendet dhe mënyrat për t’i tejkaluar ato.

Ai ka theksuar se me mandatet e ripërtërira, përmes bashkëpunimit ndërqeveritar dhe ndërshtetëror, synohet që të vazhdohet puna në shërbim të qytetarëve të të dy republikave dhe të kombit shqiptar në përgjithësi.