LAJMI I FUNDIT: Kurti flet për pagën e 13-të

Kryeministri i Albin Kurti ka vlerësuar miratimin e Buxhetit të vitit 2026 si një lajm të rëndësishëm për Republikën e Kosovës dhe qytetarët.

Ai ka rikujtuar se buxheti ishte dashur të miratohej në fund të vitit 2025, por kjo u bë e mundur vetëm tani. Kurti falënderoi të gjithë deputetët për votën mbështetëse, si dhe për vërejtjet dhe kritikat e tyre, të cilat do të trajtohen gjatë rishikimit të buxhetit.

Ai ka përmendur pikat kryesore të buxhetit prej rreth 4 miliardë euro.

“Ky buxhet parasheh 867 milionë euro për komunat; përfshin pagën e 13-të për punëtorët e sektorit publik; ndryshimin që mundëson dyfishimin e shtesës për përvojën e punës nga 0.25% në 0.50% për 15 vitet e para; si dhe shtyrjen e zbatimit të shkallës progresive të tatimit në pronë, deri në miratimin e Ligjit të ri për Tatimin në Pronë, në konsultim me komunat e vendit tonë.”

Gjithashtu, buxheti parashikon rritje të mbështetjes për barna esenciale, kulturë, sport, ndërmarrësit në sektorin privat, bujqit dhe investime në infrastrukturë publike.

Kryeministri Kurti ka theksuar se ky buxhet synon të përmirësojë jetën e qytetarëve dhe të forcojë zhvillimin ekonomik të vendit.

Ndryshe, Kuvendi i Kosovës e ka miratuar të premten ligjin për buxhetin shtetëror në vlerë rreth 4 miliardë euro, me gjithë kundërshtimet dhe ankesat e opozitës.

Projektligji për buxhetin kaloi në lexim të dytë me 62 vota për, 36 kundër dhe asnjë abstenime, katër ditë pasi ishte miratuar në lexim të parë.

Ligji tani do t’i dërgohet presidentes së Kosovës, Vjosa Osmani, për dekretim, para se të hyjë në fuqi.

Votimi erdhi pasi Komisioni për buxhet, punë dhe transfere bëri ndryshime dhe i miratoi ato në ligjin për ndarjet buxhetore për vitin 2026.

Ministri i Financave, Hekuran Murati, tha se ky është një buxhet i “përkohshëm dhe emergjent”, duke shtuar se ai do të rishikohet.

“Për këtë arsye, ne, si Qeveri, nuk ua kemi dhënë hapësirën as ministrive që të bëjnë ndryshime, duke konsideruar se nuk kemi shumë kohë për të bërë ndryshimet e nevojshme dhe në mënyrë cilësore, në mënyrë që ato pastaj të mos reflektojnë me probleme gjatë rrugës”, tha Murati.

Partitë opozitare u ankuan se rekomandimet e tyre ishin shpërfillur nga Komisioni dhe i tërhoqën ato në prag të votimit në Kuvend, prandaj edhe votuan kundër kalimit të buxhetit vjetor. Deputetë të caktuar opozitarë paraqiten amendamente gjatë seancën, por nuk morën mbështetje.

Shefi i Grupit Parlamentar të PDK-së, Arian Tahiri, e kritikoi projektligjin për buxhetin dhe njoftoi se deputetët nga partia e tij do të votonin kundër.

“Ne i tërheqim të gjitha amendamentet dhe nuk e mbështesim këtë buxhet që nuk e reflekton as përbërjen e qeverisë, nuk është dokument profesional, ka shumë defekte për 2026 por do jetë i dëmshëm edhe për vitet e ardhshme”, ka thënë ai në seancë.

Shefja e Grupit Parlamentar nga Lidhja Demokratike e Kosovës, Jehona Lushaku, tha se partia e saj nuk ka votë “për” buxhetin, pasi që Komisioni për buxhet nuk i mori parasysh amendamente e propozuara nga ajo.

Buxheti i vitit 2026 u miratua me disa muaj vonesë, dhe pasi vendi ishte detyruar ta zgjaste buxhetin e vitit të kaluar për disa muaj, për shkak të krizës politike e institucionale.