Theret me thikë 15 vjeçari, dërgohet në QKUK

Një ngjarje e rëndë ka ndodhur mbrëmjen e së premtes në fshatin Shalë të Lipjanit, ku një i mitur dyshohet se ka therur me thikë një bashkëmoshatar.

Burime të besueshme nga strukturat e afërta me hetimin bëjnë të ditur për Sinjalin se më 21.02.2026 rreth orës 21:00, autoritetet janë njoftuar nga QKUK se një i mitur, F.B. (15-vjeç) nga fshati Shalë, po merrte trajtim mjekësor pasi ishte therur me mjet të mprehtë.

Sipas të dhënave fillestare, rasti ka ndodhur rreth orës 19:20, afër xhamisë në fshatin Shalë.

Viktima është jashtë rrezikut për jetë dhe po trajtohet në QKUK.

I dyshuari, T.K. (15-vjeç) nga fshati Baicë, është shoqëruar në stacionin policor në Lipjan. Në vendin e ngjarjes kanë dalë hetuesia dhe forenzika e stacionit policor, si dhe Njësiti i Hetimeve Rajonale.

I mituri është intervistuar në prezencë të avokatit dhe prindit të tij. Me vendim të Prokurores kujdestare për të mitur, ai është dërguar në Qendrën e Ndalimit për 24 orë.

Rasti është iniciuar si “Vrasje në tentativë” dhe hetimet janë në vazhdim.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.