22 vjet burg për vr;asjen që ndodhi në Podujevë

Gjykata Themelore në Prishtinë ka shpallur aktgjykim dënues ndaj një të akuzuari për vrasjen e ndodhur në vitin 2023, duke e dënuar me 22 vjet burgim.

Në këtë dënim do të llogaritet edhe koha e kaluar në paraburgim, ndërsa masa e paraburgimit i vazhdohet deri në plotfuqishmëri të vendimit.

Sipas aktakuzës së ngritur nga Prokuroria Themelore në Prishtinë, i akuzuari në bashkëkryerje me djalin e tij të mitur kishte planifikuar dhe realizuar vrasjen për motive hakmarrjeje, pas një konflikti të mëhershëm me viktimën.

Ngjarja kishte ndodhur më 11 shtator 2023, rreth orës 12:19, brenda marketit në Podujevë, ku viktima ishte qëlluar me armë zjarri dhe kishte ndërruar jetë në vendin e ngjarjes.

Si pasojë e të shtënave ishte plagosur edhe bashkëshortja e tij, e cila ishte dërguar për trajtim në QKUK.

Gjykata ka udhëzuar palën e dëmtuar që kërkesën pasurore-juridike ta realizojë në kontest civil, ndërsa i akuzuari është obliguar të paguajë shpenzimet procedurale dhe kontributin për Fondin për Kompensimin e Viktimave të Krimit. Palët kanë të drejtë ankese në afat prej 30 ditësh në Gjykatën e Apelit.