Vrasje në tentativë në këtë fshat të Podujevës

Një incident i rëndë është shënuar pasditen e së shtunës, ku disa persona dyshohet se kanë sulmuar zyrtarët policorë gjatë kryerjes së detyrës së tyre zyrtare, duke lënë të lënduar disa policë.

Rasti ka ndodhur në fshatin Pollatë të Podujevës, ku tre persona të dyshuar janë arrestuar nga Policia e Kosovës. Sipas informacioneve zyrtare, njëri prej të dyshuarve kishte qenë duke drejtuar një traktor të ngarkuar me dru të dyshuara si ilegale, ndërsa një tjetër me automjet.

Gjatë ndërhyrjes së policisë, të dyshuarit dyshohet se kanë goditur automjetin zyrtar policor, duke shkaktuar lëndime trupore tek katër zyrtarë policorë, të cilët më pas kanë pranuar trajtim mjekësor.

Të dyshuarit janë intervistuar nga organet e rendit dhe, me vendim të prokurorit, dy prej tyre janë dërguar në mbajtje, ndërsa i dyshuari tjetër është liruar në procedurë të rregullt. /PodujevaSot/