Vjehrra nga Podujeva rrah nusen 19-vjeçare

Numri i rasteve të dhunës në familje në vendin tonë ka marrë përmasa shqetësuese.

Çdo ditë raportohen raste ku viktima zakonisht janë gratë dhe vajzat që përjetojnë dhune psikike e fizike nga bashkëshortët e tyre dhe anëtarët tjerë të familjes.

E nuk janë të rralla as rastet kur vjehrrat me nuse futen në telashe, raporton Gazeta Sinjali.

Një rast i tillë është raportuar të ketë ndodhur edhe mbrëmë në fshatin Peran të Podujevës, ku një grua 41-vjeçare po dyshohet se ka ushtruar dhunë ndaj nuses së djalit të saj, të cilën e ka sulmuar fizikisht pas një zënke që kishin mes vete.

Për pasojë, viktima 19-vjeçare ka pësuar lëndime trupore dhe më pas ka arritur të largohet nga shtëpia.

Prej aty, ajo ka shkuar te prindërit e saj prej kur e ka denoncuar rastin dhe ka rrëfyer në Polici për atë që kishte ndodhur mes saj dhe vjehrrës.

Si rezultat i denoncimit, Policia është aktivizuar për ta arrestuar të dyshuarën por e njëjta kishte ikur dhe tashmë është shpallur në kërkim.

Në lidhje me rastin, me urdhër të Prokurorit të Shtetit është iniciuar rasti për dhunë në familje, teksa veprimet e tjera do të ndërmerren pasi të kapet e dyshuara.