Andin Lokaj transferohet në këtë platformë televizive

Komentatori Andin Lokaj do ta nisë punën në platformën televizive ArtMotion që nga java e dytë e vitit 2023, pasi u largua nga Radio Televizioni Publik i Kosovës (RTK) në dhjetor.

Gazetari Lokaj njoftimin për largimin nga televizioni publik e dha përmes një statusi në Facebook më 10 dhjetor, menjëherë pas ndeshjes çerekfinale në Kupën e Botës mes Portugalisë dhe Marokut, e cila ishte e fundit e komentuar nga ai në RTK.

Dhe tani, ai karrierën do ta vazhdojë në platformën kabllore ArtMotion, ku është caktuar ta komentojë një ndeshje të kupës së Anglisë, EFL Cup, në javën e dytë të janarit.

Andin Lokaj u largua nga RTK-ja gjatë fazës finale të Kupës së Botës, pavarësisht se ishte vetëm njëri nga tre komentatorët e angazhuar për të komentuar Katarin 2022 për publikun kosovar, duke e ndërprerë marrëveshjen me televizionin publik.

Lokaj kishte thënë se ndihej i nënçmuar nga RTK-ja, drejtuesit e të cilës i krahasoi me udhëheqësin diktatorial të Koresë së Veriut.

“Në një vend ku ndihesh i nënçmuar dhe nuk vlerësohesh, nuk ke çka humb kohë kot”, kishte thënë Lokaj për Nacionalen javë më parë.

Andin Lokaj në ArtMotion do të jetë në komentim të ndeshjes Manchester City – Southampton.

Kujtojmë që ArtMotion në transmetim ka Ligën e Kosovës, Ligën e Kampionëve, La Ligan, EFL Cup, Ligën e Francës e shumë ngjarje tjera sportive.