Kalaja e Prizrenit do të bëhet me teleferik (VIDEO)

Në Kalanë e Prizrenit së shpejti do të mund të shkohet edhe me teleferik.

Për projektin e ndërtimit të tij u arrit marrëveshje në mes të Komunës së Prizrenit, Ministrisë së Mjedisit, Planifikimit Hapësinor dhe Infrastrukturës dhe agjencisë zvicrane “Swiss Contact” të martën.

“Të tria palët së bashku, do të punojnë për realizimin e këtij projekti madhor, i cili ka për qëllim tërheqjen e më shumë turistëve dhe po ashtu edhe një mundësi alternative për të vizituar Kalanë” tha zëdhënësja e Komunës së Prizrenit, Jona Hoxhaj.

Sipas saj, projekti i iniciuar nga zyrtarët komunalë i ka tri faza, ku aktualisht po bëhet projekti detal, por detaje të tjera rreth saj ende nuk dihen.

Lidhur me këtë projekt, Klan Kosova ka dërguar pyetje edhe në ministrinë që udhëheqet nga Liburn Aliu, por nuk ka marrë përgjigje gjatë të martës.

Megjithëkëtë, qytetarët e mirëpresin këtë nismë që thonë se do të sjellë më shumë vizitorë.

Tenderi për ndërtimin e teleferikut ishte hapur në prill të vitit 2017, por ishte anuluar në qershor të 2018-tës nga kryetari i atëhershëm Mytaher Haskuka, me arsyetimin se ishte në kundërshtim me tri ligje.