Arrestohen dy persona në Podujevë

Dy persona në dy raste të ndara janë arrestuar nga Policia në Podujevë.

Rasti i parë lidhet me një incident që ka ndodhur ditë më parë, ku një person i sëmurë mendor ka tentuar ta sulmojë me thikë një person tjetër.

I njëjti fillimisht ishte dërguar në Psikiatri për trajtim mjekësor, por që më pas ishte larguar. Ai është kapur nga zyrtarët policorë.

“Podujevë 12.01.2023 – 16:30. Në lidhje me rastin më 13.01.2023 është arrestuar i dyshuari mashkull  kosovar pasi i njëjti ishte larguar nga Klinika e Psikiatrisë ku ishte në trajtim mjekësor. Me vendim të prokurorit i dyshuari është dërguar në mbajtje”, thuhet në raportin e PK-së.

Kurse, personi tjetër është arrestuar në rrugën “Nuhi Gashi”.

Sipas Policisë së Kosovës, i dyshuari kishte qenë në kërkim.

Arrestimi i tij është bërë në bazë të urdhëresës së lëshuar nga gjykata, kurse më pas është dërguar në mbajtje.

Policia s’e ka bërë të ditur konkretisht se për çfarë ka qenë në kërkim i dyshuari.