Shënohet 30 vjetori i themelimit të shkollës ekonomike

Sot u shënua 30 vjetori i themelimit të Shkollës së Mesme Ekonomike “Isa Boletini”

Në manifestimin e organizuar për shënimin e 30 vjetorit të themelimit të Shkollës së Mesme Ekonomike “Isa Boletini” në Podujevë, mori pjesë kryetari i Komunës së Podujevës, Shpejtim Bulliqi, drejtori i drejtorisë së Arsimit, Avni Fetahu, veteranë të arsimit, figura dhe personalitete të shquara të dala nga kjo shkollë, nxënës dhe personel arsimor.

Kryetari Bulliqi në përvjetorin jubilar të shkollës kumtoi lajmin e mirë që këtë vit do të filloi ndërtimi i Shkollës së Mesme Ekonomike, projekt në vlerë mbi 2 milionë euro i financuar nga komuna.

Shkolla e re ekonomike do të ndërtohet në kompleksin e dy shkollave të tjera të mesme të Podujevës, ndërsa objekti aktual i shkollës ekonomike do të shndërrohet në shkollë fillore.

Kryetari Bulliqi në këtë vit jubilar ua uroj përvjetorin e shkollës ekonomike të gjithë nxënësve, mësimdhënësve, prindërve, veteranëve të arsimit dhe gjithë qytetarëve të Podujevës.

Ndërsa, drejtori i shkollës, Muhamed Sejdiu, foli për historikun e shkollës, përmirësimin e kushteve infrastrukturore dhe furnzimin e kabineteve të shkollës i cili ndikon në përmirësimin e cilësisë së arsimit te nxënësit.

Në rastin e shënimit të ditës së shkollës personeli arsimor dhe nxënësit kishin përgatitur një program të pasur kulturor dhe artistik, si dhe pas programit pati një koktej rasti.