Fermerët në krizë, detyrohen t’i shesin bagëtitë
Rritja e çmimeve i ka prekur edhe fermerët e Kosovës. Për shkak të shtrenjtimit të ushqimit, shumë prej tyre i kanë shitur bagëtitë. Për shkak të kësaj, thonë se janë detyruar t’i largojnë edhe punëtorët nga puna, pasi që nuk po kanë mundësi t’i paguajnë. Nga Shoqata e Bujqve kanë thënë se shumë bujq e fermerë janë në situatë të vështirë.
Stalla i ka mbetur e zbrazët.
Nga 230 krerë lopë sa i kishte, 200 prej tyre i ka shitur.
Kjo pasi fermeri Samir Krasniqi nga Sibovci i Obiliqit, thotë se nuk pati mundësi t’i mbante të gjitha.
Ai thotë se çmimi i ushqimit të kafshëve është rritur 100% dhe një situatë e tillë, sipas tij, nuk i ka ndodhur kurrë më parë prej se e mban fermën.
Pasi shiti shumicën e lopëve, Kraniqi thotë se nuk pati mundësi t’i paguante të gjithë punëtorët, prandaj tre prej tyre u detyruan të largohen.
Nga Shoqata e Bujqve kanë thënë se shumica nga blegtorët kanë filluar të shesin bagëtitë.
Sipas kryetarit të kësaj shoqate, Tahir Tahiri, shumë prej bujqve dhe fermerëve janë në gjendje të rëndë, derisa shpreson se situata të zbutet nëse ekzekutivi realizon zotimet për subvencione.
Ndërkaq, kryetari i Obiliqit, Xhafer Gashi, ka thënë se rasti i fermerit Krasniqi, nuk lidhet shumë me aspektin e rritjes së çmimeve, pasi sipas tij, prona në të cilën ndodhet ferma është në procedurë të shpronësimit nga ana e KEK-ut.
Ai ka thënë se me gjithë shtrenjtimin e çmimeve, Komuna e Obiliqit sipas buxhetit, u ka dal në ndihme bujqve dhe fermerëve.
Kanal 10 ka provuar të marr një qëndrim edhe nga Ministria e Bujqësisë, Pylltarisë dhe Zhvillimit Rural, por që nuk janë përgjigjur gjatë ditës.
Fermerët edhe më parë kanë qenë në situatë të vështirë, pasi që ata vazhdimisht janë përballur me pamundësitë për të shitur produktet e qumështit, për çka edhe kishin protestuar disa herë.
Ndërkaq, gjendja e tyre është rënduar edhe më shumë me shtrenjtimin e shumë çmimeve në vend, përfshirë ato me të cilat mundësohet mbajtja e një ferme.
Raporti: Arbenita Ilazi/Kanal10
