Një shkollë ndërprenë mësimin, shkak vërshimet

Kryetari i Komunës së Istogut, Ilir Ferati e konsideron të rëndë gjendjen në komunën e Istogut si pasojë e vërshimeve. Ai tha se situata është e ngarkuar me sasi të ujit më shumë se herën e kaluar kur kjo komunë u përball me vërshime.

Ferati njoftoi se janë tetë fshatra të cilat po përballën me vërshime derisa fshati Drejë regjistron 12 familje që vazhdojnë të jenë të bllokuara deri në arritjen e ekipeve të FSK-së për evakuim dhe të gjithë banorët e bllokuar do të largohen nga shtëpitë e tyre.

Në anën tjetër, shkolla fillore e mesme e ulët “Avni Rrustemi” në fshatin Zallq ka njoftuar se ditën e nesërme nuk do të mbahet mësim si shkak i vërshimeve.

Njoftimi i plotë:

NJOFTIM

Të nderuar mësimdhënës, nxënës dhe ju prindër pas reshjeve të mëdha të shiut është vështirësuar qarkullimi nga fshatrat Drejë, Zabllaq, Rudicë, Prekallë dhe një pjesë e Zallqit dhe për shkak të rrezikut që paraqet kalimi i nxënësve në ato rrugë nesër, me datë 20.01.2023 nuk do të mbahet mësim!