Dy shtëpi të rrënuara e mbi 300 të dëmtuara nga vërshimet (VIDEO)

Vërshimet e ditëve të fundit ia rrënuan katin e parë shtëpisë së familjes Imeri në Tushilë të Skenderajt.

Si pasojë, objekti u bë krejtësisht i pabanueshëm, raporton Klan Kosova.

Në fakt kjo është njëra nga dy shtëpitë e zonave të prekura në këtë komunë të cilat janë rrënuar.

Edhe atyre që iu shpëtuan sado pak katet e sipërme të banimit, kushtet për jetesë i kanë minimale.

Këta dhe gjithë të tjerët që pësuan nga përmbytjet, komuna qysh nga mbrëmja e se premtes dhe gjatë të shtunës po i ndihmon me produkte bazike, ndër më të nevojshmet është uji i pijshëm.

E, dëmet konsiderohen të jenë milionëshe, përfshirë infrastrukturën publike, dëmtimet e urave, bizneset dhe ekonomitë familjare.

Për t’iu dalë në ndihmë të gjithë qytetarëve që kanë pësuar, komuna të hënën do e hapë një fond.

Kryetari i Komunës, Fadil Nura thotë se kjo ka ardhur për shkak se shumë mërgimtarë dhe qytetarë kanë shprehur dëshirën e ndihmës.

Megjithëkëtë shpreson në ndihmën e nivelit qendror, ani se një ankesë e kishte për presidenten Vjosa Osmani, kur kjo e fundit e vizitoi këtë zonë.

Aktualisht pos një nënë vetushqyese është strehuar në shtëpinë e të moshuarve, të tjerët kanë gjetur vend tek familjarët. /Klankosova.tv