Kërkohet që vlera e koeficientit të mos jetë nën 130 euro
Kanë mbetur pak ditë kur Ligji i Pagave pritet të hyjë në fuqi. Por, askush nga zyrtarët publikë nuk do ta dijë sa do ta ketë pagën. Kjo pasi që Qeveria e Kosovës ende nuk e ka treguar vlerën e koeficientit. Për këtë, kritika ndaj ekzekutivi të vendit kanë hedhur sindikalistët dhe nga opozita. Ata kanë thënë se çdo vlerë e koeficientit nën 130, do të jetë i papranueshëm për ta.
Është miratuar javë më parë në Kuvendin e Kosovës, por ekzekutivi i vendit vazhdon ta mbajë të fshehtë vlerën e koeficientit të Ligjit për Paga.
Kur kanë mbetur edhe dhjetë ditë që ky ligj të hyjë në fuqi, punëtorët e sektorit publik ende nuk e dinë se sa do të jetë paga e tyre.
Kryetari i Sindikatës së Pavarur të Administratës së Kosovës, Ali Gashi ka deklaruar se mos përcaktimi i vlerës së koeficientit për paga ka krijuar shqetësim dhe pakënaqësi tek zyrtarët publikë.
Gashi është shprehur se çdo vlerë e koeficientit që është nën 130 euro, i obligon që të bisedojnë me partnerët sindikalistë dhe të shohin se si do të veprojnë tutje.
Që vlera e koeficientit të Ligjit për Paga të mos jetë nën 130 euro e kanë kërkuar edhe nga partitë opozitare.
Aleanca për Ardhmërinë e Kosovës ka paralajmëruar se do ta dërgojë në Gjykatën Kushtetuese Ligjin e Pagave, nëse vlera e koeficientit është nën 130 euro.
Ndërsa, eksperti i çështjeve të ekonomisë, Safet Gërxhaliu ka thënë se çdo koeficient që do të jetë nën shkallën 120 euro, do të sjellë pakënaqësi.
Kurse, kryetari i Aleancës Kosovare të Bizneseve, Agim Shahini, e ka quajtur jotransparente mos bërjen publike të vlerës së koeficientit.
Qeveria e Kosovës tash e sa kohë kishte thënë se vlera e koeficientit të Ligjit të Pagave do të bëhet e ditur gjatë muajit janar, por një gjë e tillë ende nuk ka ndodhur.
Ligji i Pagave ishte miratuar edhe vite më parë, por ai ishte rrëzuar më pastaj nga Gjykata Kushtetuese, derisa njëjtë mund të ndodhë edhe në herën e dytë, nëse nuk merren parasysh vërejtjet e kategorive të ndryshme.
Raporti: Arza Kastrati / Kanal10
