Podujevë: Grabitje me armë në një pompë të derivateve
Pompat e derivateve në qytete e fshatra në vendin tonë jo rrallëherë janë cak i hajnave. Kjo dukuri po krijon pasiguri dhe frikë si për qytetarët ashtu edhe për punëtorët që punojnë në këto biznese.
Një rast i tillë ka ndodhur edhe sot në një pikë në pompën e derivateve në Peran të Podujevës, raporton Gazeta Sinjali.
Sinjali mëson se një person i maskuar, i cili akoma nuk është identifikuar, fillimisht ka shtënë me armë e më pas ka hyrë brenda pompës dhe nën kërcënimin e armëve ka arritur që t’ia marrë punëtorit të gjithë pazarin ditor, rreth 400 euro.
Bazuar në dëshminë e punëtorit të dhënë para hetuesve policorë, posa i dyshuari ka marrë paratë është larguar në këmbë nga vendi i ngjarjes dhe s’ka pasur mundësi ta identifikojë.
Me t’u denoncuar rasti, Policia ka dalë në vendin e ngjarjes ku kanë kryer ekzaminimet e nevojshme që ndihmojnë në zbardhjen e rrethanave të rastit.
Në lidhje me rastin, me urdhër të Prokurorit të Shtetit, rasti është cilësuar ‘Grabitje’, teksa veprimet tjera ligjore do merren posa të kapen të dyshuarit.
