Dy persona e bëjnë llom një 28-vjeçar për disa SMS

Mosmarrëveshjet mes qytetarëve shpesh herë përcillen me ofendime e kërcënime ndaj njëri-tjetrit. Madje nuk janë të rralla rastet kur ato shpërthejnë në dhunë, duke u përleshur fizikisht mes vete, raporton Gazeta Sinjali.

Një rast i tillë ka ndodhur mbrëmë në rrugën ‘Papa Klementi’ në Pejë, ku janë përfshirë në një rrahje tre persona.

Burimet e Gazetës Sinjali kanë bërë me dije se si pasojë e përleshjes, një 28-vjeçar ka pësuar lëndime trupore dhe si pasojë ka kërkuar ndihmë mjekësore në spital.

E gjitha ngjarja dyshohet të ketë ndodhur për shkak të një konflikti verbal dhe disa SMS-ve ofenduese që dy nga të dyshuarit kishin shkëmbyer mes vete.

Kjo ka bërë që 29-vjeçari bashkë me mikun e tij të shkojnë te 28-vjeçari dhe të njëjtin dyshohet se e kanë sulmuar fizikisht duke e goditur me shqelma dhe grushte.

Lidhur me rastin është njoftuar edhe Policia e Kosovës të cilët kanë dalë në vendin e ngjarjes dhe kanë kryer ekzaminimet që ndihmojnë në zbardhjen e rrethanave të rastit, e po ashtu edhe kanë arrestuar të dyshuarit.

Dy nga personat e përfshirë në rrahje kanë përfunduar në ndalim policor, ndërsa i treti do të hetohet në liri. Me urdhër të prokurorit, ndaj tyre është iniciuar rasti për veprat ‘Kanosja’ dhe ‘Lëndim i lehtë trupor’.