Pas të shtënave, 38-vjeçari e bëri për spital të dyshuarin tjetër

Mosmarrëveshjet e momentit mes qytetarëve shpesh herë përcillen me ofendime e kërcënime ndaj njëri-tjetrit.

Madje nuk janë të rralla rastet kur ato shpërthejnë në dhunë, duke u përleshur fizikisht mes vete.

Gjatë përleshjeve pos grushteve, shpesh përdoren edhe mjete të mprehta e armë të zjarrit, ku shumë raste kanë përfunduar tragjikisht, raporton Gazeta Sinjali.

Në përleshje fizike ka ndodhur mbrëmë në lokalin ‘Urban Bar’ në Fushë Kosovë, ku mes të tjerash janë dëgjuar edhe disa të shtëna me armë zjarri.

Burimet e Gazetës Sinjali kanë bërë me dije se gjithçka kishte filluar pasi një 36-vjeçar dyshohet se ka sharë e kërcënuar të dyshuarin tjetër dhe më pas i njëjti ka shtënë me armë.

Në tentativë për t’ia marrë armën, i dyshuari tjetër 38-vjeçar dyshohet se e ka sulmuar fizikisht të dyshuarin e parë, të cilit i ka shkaktuar lëndime të rënda trupore me anë të goditjeve.

Lidhur me rastin është njoftuar Policia, të cilët kanë dalë në vendin e ngjarjes dhe kanë lokalizuar të dyshuarit të cilët janë shoqëruar në stacion policor për intervistim.

Pas përfundimit të procedurave policore, Prokurori i Shtetit ka urdhëruar që të dyshuarit të hetohen në liri për veprat penale “Shkaktim i rrezikut të përgjithshëm”, “Armëmbajtje pa leje” dhe “Lëndim i rëndë trupor”.