Ishte larguar nga shtëpia dje, gjendet pa shenja jete një person
Një ngjarje e rëndë ka ndodhur sot në fshatin Manishincë të komunës së Artanës, ku një person i moshuar është gjetur pa shenja jete, raporton Gazeta Sinjali.
Burimet e Gazetës Sinjali brenda Emergjencës kanë bërë me dije se kanë pranuar thirrje për ndihmë, pasi që një person është gjetur i shtrirë pa ndjenja dhe dyshohej se ishte në rrezik për jetën.
Ekipi mjekësor i Emergjencës ka dalë në vendin e ngjarjes, ku kanë hasur në trupin e të moshuarit dhe pas ekzaminimit për shenjat vitale, mjeku ka konstatuar se viktima ka ndërruar jetë.
Lidhur me rastin është njoftuar edhe Policia e Kosovës të cilët kanë dalë në vendin e ngjarjes dhe kanë kryer ekzaminimet që ndihmojnë në zbardhjen e rrethanave të rastit.
Në kuadër të veprimeve hetimore, policët kanë intervistuar nipin e viktimës, i cili ka deklaruar se 84-vjeçari gjatë ditës së djeshme kishte dalë nga shtëpia rreth orës 17:00 dhe më nuk ishte kthyer. Kjo kishte aktivizuar familjarët dhe banorët e fshatit që të nisin kërkimet për viktimën, i cili u gjet mëngjesin e sotëm në një luginë pyjore pak larg shtëpisë së tij.
Me urdhër të prokurorit, rasti është cilësuar ‘Vdekje e dyshimtë’ dhe trupi i pajetë i viktimës është dërguar në Institutin e Mjekësisë Ligjore për obduksion.
