Një person i kërkon cigare një gruaje dhe ia vjedh çantën me para

Rastet e grabitjeve e të vjedhjeve po vazhdojnë të rriten, ndërkohë që siguria për të lëvizur edhe në hapësirat publike po rrezikohet. Ndër rastet e shpeshta të grabitjeve janë gjësendet me vlerë, si stolitë e arit, telefonat e çantat e krahut që hajnat arrijnë t’i kapin nga qytetarët nëpër rrugë, raporton Gazeta Sinjali.

Kështu ka ndodhur edhe të hënën në Gjakovë, ku viktimë është një shtetase e huaj, e cila u mashtrua nga një qytetar, në orët e pasdites në rrugën “UÇK”.

Burimet e Gazetës Sinjali brenda Prokurorisë kanë bërë me dije se viktima derisa po ecte rrugës është ballafaquar me një person, i cili fillimisht i kishte kërkuar cigare e më pas ka arritur t’ia marrë çantën me para e stoli ari. Bazuar në dëshminë saj, në çantën që iu vodh kishte stoli të arit në vlerë të mbi 5 mijë euro, si dhe para të gatshme rreth 1 mijë euro.

Sipas viktimës, i dyshuari me të kryer veprën është larguar me shpejtësi në këmbë në një drejtim të panjohur. Përballë kësaj situate, ajo ka kërkuar ndihmën e Policisë, duke e denoncuar rastin.

Njësitë policore kanë marrë të gjitha veprimet hetimore që ndihmojnë në zbardhjen e rrethanave të rastit dhe identifikimin e personit të dyshuar. Me urdhër të prokurorit, rasti është iniciuar “Vjedhje e rëndë”, ndërsa veprimet tjera ligjore do merren posa të arrestohet i dyshuari.