Detaje për vdekjen tragjike të 15-vjeçares: Humbi kontrollin gjatë skijimit dhe u përplas në guri

Pasditen e sotme ndodhi një rast tragjik në Qendrën e Skijimit në Brezovicë, ku një 15-vjeçare vdiq pasi u aksidentua teksa po skijonte me babain e saj.

Viktima e cila ishte nga Leposaviqi u dërgua në Spitalin e Mitrovicës, por fatkeqësisht nuk arriti t’iu mbijetojë plagëve dhe vdiq, raporton Gazeta Sinjali.

Rastin e ka konfirmuar edhe Policia, teksa Sinjali ka mësuar detaje të reja. Sinjalizuesi nga Veriu ka bërë me dije sipas informacioneve të para, viktima kishte humbur kontrollin teksa po skijonte dhe papritmas është përplasur në një guri.

Për pasojë, vajza mori lëndime të rënda, me ç’rast ndihma e parë i është dhënë në vendin e ngjarjes dhe menjëherë është dërguar në spital. Aty, përkundër intervenimeve të mjekësve, 15-ndërroi jetë dhe vdekja e saj u konfirmua nga ekipi mjekësor.

Lidhur me rastin janë ndërmarrë të gjitha veprimet hetimore nga  Policia, ndërsa është vënë në dijeni edhe Prokurori i Shtetit.

“Sot, rreth orës 16:00, policia e stacionit në Shtërpcë ka pranuar një informacion se në Qendrën e Skijimit në Brezovicë rreth orës 12:00 ka ndodhur një lëndim trupor gjatë skijimit të një personi e gjinisë femër M.B e nacionalitetit serb, e moshës rreh15 vjeçare. Pas ndihmës së parë në Shtërpcë me autoambulancë për tretman të mëtutjeshëm mjekësor është dërguar në spitalin e Mitrovicës.

Rreth orës 17:50 policia është njoftuar se nga lëndimet e pësuara e njëjta ka ndërruar jetë në spitalin e Mitrovicës.”, ka njoftuar edhe Policia.