Ish-ushtari i UÇK-së që humbi këmbën në shërbim të atdheut (VIDEO)

Me veshje që simbolizojnë Ushtrinë Çlirimtare të Kosovës po nisen drejt maleve të Baincës.

Këtë herë, jo për të luftuar, as me armë në brez, por me paterica.

Që nga përfundimi i luftës është hera e katërt që Remzi Lestrani viziton vendin ku dha shumë për çlirimin e vendit.

Lestrani i ishte bashkuar Ushtrisë Çlirimtare të Kosovës në moshën 21-vjeçare, e për këtë thotë se ndjehet krenar dhe se kanë qenë ditët më të ndritura për të.

“Si shumë të rinj edhe si popull i vuajtur sidomos në familjet në Drenicë, gjyshërit kanë qenë pjesëtar të luftës, të Shaban Polluzhës, vëllai i burgosur politik,na ka detyrua sidomos mos me na u dhimt jeta ka qenë kushtrimi i Adem Jasharit me familje, pas vrasjes se komandantit, s’ka pas të rinj  që s’ka qenë në gjendje me marr armën edhe me vdek për atdhe”, u shpreh ai.

Ish-luftëtari i UÇK-së, tregon se pas disa muajsh luftime, kishte përfunduar i plagosur rëndë.

“Kam pas fatin që më 23 maj 1999 në përfundim të luftës, jam plaguar, kam marr plagë të rënda, në këmbën e majtë një plumb, në këmbën e djathtë kam protezë”, tha Lestrani.

Për orë me radhë, shokët e luftës e kishin mbajtur në krahë për ta larguar nga vendi i plagosjes.

“Organizimi qysh më kanë tërheq 9 orë deri më kanë qua në bjeshkët e Berishës në shpinë më kanë mbajt, ka qenë vullneti i tyre mos me lanë shokë të plagosur mbrapa”, tha ai,

Ndihmën e parë e ka marrë nga shoku i tij, e në spitalin e improvizuar në bjeshkët e Berishës, i është amputuar këmba

“Janë detyruar me ma bo operacionin, operacioni është bërë pa anestezion, e kam bërë amputimin e këmbës pa anestezion për mos mu përhap infeksioni”, shtoi ai.

Falë mjekëve të luftës, ish-ushtari thotë se ka shpëtuar ai dhe shumë ushtarë të tjerë.

Me ndërhyrjen e NATO-s në Kosovë, Lestrani së bashku me shumë luftëtarë ishin dërguar në Shqipëri, ku pas një kohe të shkurtë kishte vazhduar për në Itali. Atje edhe i ishte vendosur proteza në këmbë.

Në nëntor të 1999 ishte kthyer në Kosovë, ku nuk dinte as për fatin e familjarëve.

“Me familje jam takuar në nëntor 1999, janë kanë disa vende të improvizuara, shtëpia të shkatërruara të djegura, i kishin bërë vetëm të përkohshme, gëzimi më i madh liria, edhe si kam ardhur duke pyetur për bashkëluftëtarët”, rrëfeu më tej Lestrani.

Pas përfundimit të luftës, jeta për ta nuk ka qenë aspak e lehtë,mirëpo për të me shpalljen e pavarësisë, u përmbush një ëndërr shekullore.

“Gjithë ata njerëz që kanë rënë për liri dhe pavarësi, nuk ka pas gëzim më të madh”, u shpreh Lestrani.

E në 15-vjetorin e Pavarësisë, ish-ushtari thotë se ndjenja për këtë festë ka filluar të zbehet.

“Po ka filluar me u zbeh, me padrejtësitë që po bëhen në Gjykatën e Hagës, njerëzit më meritor që kanë bërë për liri tash po akuzohen si kriminel a në fakt, kriminelët dihet se kush janë”, përfundoi ai.

Sipas tij, festa e pavarësisë nuk ka vlerë të festohet pa krerët e UÇK=së të cilët po gjykohen në Hagë.

Kronika e gazetares Arlinda Sejdiu-Latifi.