Bruksel: Fillon takimi Kurti- Vuçiq

Pas takimeve të ndara që patën Kryeministri i Kosovës, Albin Kurti dhe Presidenti i Serbisë, Aleksander Vuçiq me Shefin e politikës së jashtme të Bashkimit Evropian, Josep Borrell, dhe të dërguarin e BE-së për dialogun Kosovë-Serbi, Mirosllav Lajçak, sapo ka filluar takimi mes Kurtit dhe Vuçiq raporton nga Bruksel, gazetari i kanal 10, Kushtrim Sadiku, i cili bashkë me gazetarin Arben Ahmeti janë duke ndjekur nga afër zhvillimit më të fundit nga vendi ku po mbahen takimet e sotme.

Në këtë takim palët do të diskutojnë për planin franko-gjerman i cili parasheh formimin e Asociacionit të komunave me shumicë serbe në Kosovë.

Sipas gazetarit Arben Ahmeti në takimin e sotëm Kurti-Vuçiq, kryeministri Kurti do të paraqes  një propozim për zgjerim të kompetencave për të gjitha komunat e Kosovës, duke përjashtuar kështu një asociacion të veçantë për komunat me shumicë serbe në Kosovë.

Bazuar në të gjitha zhvillimet që po ndodhin atje sipas Ahmetit gjasat janë të vogla që të këtë një marrëveshje mes Kurtit dhe Vuçiqit.

Nëse do të kemi një marrëveshje sot mes dy palëve do të kuptojmë pas takimit Kurti-Vuçiq kur është paralajmëruar një konferencë për medie./ Gazeta10/