Aksident i rëndë, 19 vjeçari dërgohet në gjendje të rëndë në spital
Numri i madh i aksidenteve në trafik po vazhdon të jetë shqetësues.
Çdo ditë raportohet për aksidente të shumta në komunikacion dhe në të shumtën e rasteve shkaktohen si pasojë e pakujdesisë së shoferëve gjatë vozitjes, duke rrezikuar kështu jetën e tyre dhe të pjesëmarrësve tjerë në trafik, raporton Gazeta Sinjali.
Një aksident në trafik ka ndodhur edhe mëngjesin e sotëm në rrugën ‘Fahri Fazliu’ në Rahovec, ku si pasojë ka mbetur i lënduar rëndë një 19-vjeçar.
Burimet e Gazetës Sinjali brenda Emergjencës në Spitalin Rajonal ‘Isa Grezda’ në Gjakovë kanë bërë me dije se i riu është dërguar atje me frakturë në këmbë dhe gjakderdhje në kokë.
Pas dhënies së ndihmës së parë dhe për shkak të natyrës së lëndimeve, viktima është transferuar në Qendrën Klinike Universitare të Kosovës për trajtim të mëtutjeshëm mjekësor.
Sinjali mëson se deri te aksidenti dyshohet të ketë ardhur për shkak të mospërshtatjes së shpejtësisë me kushtet e rrugës, ku si pasojë 19-vjeçari ka humbur kontrollin mbi timon dhe ka kaluar në anën e kundërt ku ka goditur automjetin tjeter të përfshirë.
Kujtojmë se në vazhdimësi bëhet thirrje për kujdes në komunikacion, pasi rastet e aksidenteve me fatalitet nuk po kanë të ndalur dhe shkaktarët më së shpeshti janë moszbatimi i rregullave.
