Zgjidhet ‘ngërçi’ për mbledhjen e mbeturinave, punëtorëve u rriten pagat për 70 euro
Nënkryetarja e Komunës së Prishtinës, Donjeta Sahatçiu, ka thënë se është zgjidhur ngërçi i mbledhjes së mbeturinave në kryeqytet.
Përmes një postimi në rrjetin social Facebook, Sahatçiu ka thënë se rreth 500 punëtorë me funksione teknike, nga muaji prill, do të kenë rritje rroge për 70 euro.
“Kjo zgjidhje nuk e plotëson nevojën e punëtorëve për kompenzim meritor e kushte më të mira të punës, ashtu sikurse nuk e zgjidh problemin e menaxhimit të mbeturinave në Kryeqytet përgjithmonë. Derisa e drejta për grevë për paga më të larta është e drejtë e secilit, ndërprerja e tërësishme e shërbimit për të cilin paguhen nuk është e drejtë për qytetarët që kërkojnë shërbim” ka thënë mes të tjerash Sahatçiu.
Sipas saj, për të përshpejtuar procesin e mbledhjes së mbeturinave tashmë të grumbulluara disa ditë, Komuna ka angazhuar ekipe me operatorë privatë dhe kanë kërkuar mbështetje me kamionë nga njësitë e tjera të ndërmarrjes.
“Kryeqyteti nuk mund të vazhdojë pa fund të subvensionojë ndërmarrjen dhe të paguajë për shërbimet që nuk i pranon në nivelin e dëshiruar. Gjendja e fundit që vuri në rrezik edhe shëndetin e qytetarëve është e pa pranueshme dhe nuk guxojmë t’a lejojmë të përsëritet më”, ka thënë tutje Sahatçiu.
