Anthony Joshua: Nëse humb të shtunën, pensionohem

Anthony Joshua thotë se do të pensionohet nga boksi, nëse e humb luftën kundër Jermaine Franklin të shtunën në Londër.

Dy herë kampioni i botës në kategorinë e rëndë do të rikthehet në ring në fundjavë për t’u përballur me amerikanin, pas dy disfatave radhazi nga duart e Oleksandr Usyk.

Joshua do të kërkojë ta fitojë luftën e parë profesionale që nga dhjetori 2020, por e ka pranuar se do të tërhiqet nga boksi nëse e humb luftën e tretë radhazi.

“Do të pensionohem. Do të pensionohem nëse humb. Nuk jam këtu për t’i luftuar njerëzit. Nëse njerëzit duan që unë të pensionohem, do të pensionohem”, tha Joshua.

“Nuk do të luftoj nëse njerëzit nuk duan që unë të luftoj. Madje nuk ka të bëjë as me paratë. Ka të bëjë me shpirtin tënd luftarak. Kjo ka rëndësi. E di kur të jem i pensionuar, do të argëtohem. Do të mendoj ‘varja të gjithëve’. Unë e kam kryer”, shtoi ai.

Kjo do të jetë lufta e tij e parë që prej disfatës kundër Oleksandr Usyk, i cili ia mori titujt e botës në shtator 2021 dhe pastaj e mundi përsëri 11 muaj më vonë.

Pasi i pësoi dy humbje radhazi për herë të parë në karrierë, shumë njerëz e vunë në dyshim rikthimin e tij në majat e boksit botëror, raporton Nacionale.

Por, 33-vjeçari do ta fillojë të shtunën rrugën e gjatë dhe sfiduese për t’u kthyer në majat e kategorisë së rëndë.

Siç qëndrojnë gjërat, Usyk ende i mban tre titujt e pranuar në kategorinë e rëndë WBA (Super), IBF, dhe WBO, ndërsa Tyson Fury e mban të katërtit, WBC.

Joshua synon që brenda 16 muajve të bëhet sërish kampion bote.

“Dëshira? Njëra ndër to është patjetër të bëhem kampion bote, gjë që mendoj se është e mundshme në 16 muajt e ardhshëm”, nënvizoi ai.

“Mendoj se duhet ta shohim se çfarë do të ndodhë me brezat këtë vit. Le të garohet për ta dhe pastaj mbase le të mbesin pezull dhe mandej e shohim se ku do të përfundojnë. Duhet të kem vazhdimësi, përqendrim në 12 apo 16 muajt e ardhshëm derisa jam në garë për titull”.