Pasojat e lumit Llap, bujqit ankohen për dëme (VIDEO)

Lumi Llap në Podujevë vazhdon t’ua vështirësojë jetën banorëve që jetojnë në afërsi të tij. Derisa kërkohet rregullimi i shtratit të lumit, pasojat nga dëmet që bënë vërshimet e fundit vazhdojnë të jenë ende prezente te bujqit. Në Komunën e Podujevës fajtorë i bëjnë banorët për pengimin e punëve teksa premtojnë të merren me këtë problematikë.

Pas vërshimeve të fundit, lumi Llap në Podujevë la pasoja gjithandej.

Ndër më të prekurit po dalin të jenë bujqit.

Bujku, Hasan Hoxha nga fshati Penuhë thotë se dalja e shpeshtë e lumit nga shtrati po ua vështirëson punimin e tokave bujqësore.

Ai thotë se edhe pas dëmeve, kërkesa e tij e vetme ishte rregullimi i shtratit të lumit, që ta ketë më të lehtë punën në toka.

Edhe pas ankesave, sipas tij, komuna nuk ndërmori asgjë, derisa në fshat mbetën edhe mbeturina të shumta.

Ndërsa për këtë, zëdhënësi i komunës së Podujevës, Fatri Zhitia thotë se komunës iu pengua puna për rregullim e shtratit për shkak të problemeve pronësore, derisa pritet ta zgjidhin së shpejti.

Familjet në afërsi të lumit vazhdojnë me mjete vetanake të gjejnë zgjidhje për të krijuar pengesa skaj rrjedhës së lumit që ti mbrojnë shtëpitë e tyre. /Gazeta10/

Raporti: Saranda Alshiqi