Burri ushtron dhunë ngaj gruas për shkak të parave

Dhjetëra raste të dhunës në familje raportohen çdo ditë në Policinë e Kosovës, ku viktima janë kryesisht gratë që pësojnë nga bashkëshortët e familjarët e tjerë.

Një ngjarje e tillë ka ndodhur së fundmi në një familje në fshatin Miradi e Epërme në Fushë Kosovë, raporton Gazeta Sinjali.

Sinjali mëson se bëhet fjalë për një 38-vjeçare, e cila e ka denoncuar në Polici bashkëshortin për dhunën që ka ushtruar ndaj saj, duke e keqtrajtuar fizikisht, pas një mosmarrëveshje mes tyre.

Bazuar në dëshminë e saj, të dhënë para hetuesve policorë, i dyshuari F.B., e ka rrahur atë me grushte pasi u kapën për shkak të të hollave, ku për pasojë i ka shkaktuar frikë dhe shqetësim të madh.

Përballë kësaj situate, viktima ka vendosur të kërkojë ndihmën e Policisë dhe si rezultat i denoncimit, i dyshuari është arrestuar dhe më pas u shoqërua në stacion policor.

I dyshuari është intervistuar në stacion policor në lidhje me veprën për të cilën dyshohet, me ç’rast ka shprehur pendesë për atë që ka ndodhur.

Por ndonëse ka ushtruar dhunë psikike dhe fizike, Prokurori i Shtetit ka vendosur që ta lirojë, për ta hetuar në procedurë të rregullt.

Rastet e tilla kur burrat e dyshuar për dhunë ndaj vajzave dhe grave lirohen nuk janë të rralla dhe shpesh ka ngritur debat në opinion se organet e rendit nuk po bëjnë mjaftueshëm për këtë dukuri shqetësuese, që është kthyer në tragjedi për shumë familje.